الموضوع: دردشـة على ضـفاف تاسـي ،،،

بسم الله الرحمن الرحيم

السلام عليكم ورحمة الله وبركاته ،،،

=======================

المدردش : وش هالنزول يا تاسي أعدمت خلق الله ...؟!

تاسي : غريبة : ليش ما كان السؤال وش هالإرتفاع يا تاسي لا توهق خلق الله....؟!

المدردش : كل الناس تدور الإرتفاع ، ما نكسب إلا إذا إرتفعت ، المهم هالحين إنت رحت فيها وطلعت من خيارات المتاجرين كسوق على الأقل للستة شهور القادمة ، وش تبي تسوي...؟

تاسي : وش أقدر أسوي .... إنت تذكر جالسين أربعين أو خمسين ألف متداول ما عندنا من الشيطان طاري ، فجأة إنكبت الناس وصرنا أكثر من ثلاثة ملايين ومن زين الطبايع جايبين معهم الإنترنت :schmoll: لا قوانين ولا أنظمة جاهزة لتفعيل تلك القوانين ، وشبكة تداول ترقل وشبكة إتصالات ما هي بعيدة عنها ، وطيرونا وطرنا بالعجة :laugh1:

المدردش : طيب ، وهالحين وش النية...؟

تاسي : طارت الطفرة وجت الفكرة ، رجعوا على رقع يا مرقع ، ومثل ما تفضلت أصبر نشوف وش يسوون...! :tears:

المدردش : الزبـــــدة ، ما عاد فيك رجاء ...؟!

تاسي : هالحين قاعد إنت وربعك تمسخر وتشرشح فيني وتسأني الزبدة,,,؟ أي زبــدة ..؟

المدردش : يعني ندور إرتدادات حلوة مثل إرتدادات مستوى العشرة ألاف نمزمز عليها :icon10:

تاسي : شوفت عينك ما عندي شئ أخبيه... قلنا وش تقول وكالة يقولون ....؟

المدردش : ما هي وكالة يقولون بس ، حتى الشارت يقول و يروع يا تاسي غربلك الله.

تاسي : يالله كمل الناقص ، عطنا وش عندك...؟

المدردش : أولا الشارت ، وبعدها " وكالة يقولون " :laugh1:

الشارت الشهري يقول دبور في نزول ، والشارت الأسبوعي في نزول وعنده قصص وحكايات :

بصراحة انت مش معطي القمم السابقة أي إعتبار ومحترم القيعان ، إذا دخلت مستوى تروح للقاع وترتد منه ، يعني إذا تجاوزنا 7500 وهو أخر قاع في مستوى 8000 راح ندحدر لـ 5000 والله يستر لا نوصل 4000.

تاسي : ليه ..؟ خير إن شاء الله وش هالمستويات المتدنية ...؟ وش مبرراتك...؟

المدردش : انت تعرف عندنا في التحليل التاريخ يعيد نفسه ، وإذا دققت في ردة فعلك عند مستوى الفايبو 161% (المربع البني) ثم شفت وش صار أقول الله يستر ، كان الإرتداد بـ 2000 نقطة وبعدها هويت فينا أكثر من 4000 نقطة إلى مستوى 9472. أما إرتداد الأسبوع الماضي كان 500 نقطة بـس

ومقارنة بالأسواق الأخرى التي سبق وإن طارت بالعجة مثلك نجد بأنها تعود إلى المستويات التي بدأت منها أو قريب منها ، خاصة وأنت تعاني من مشاكل كبيرة وجوهرية لا تشجع المتاجرين والمستثمرين بالدخول الأن.

أما الشارت اليومي فهو يدعوا للتفاؤل المصحوب بالحذر ، عمل ثلاث قيعان متتالية اعلى من بعضها البعض عند مستوى الـ 8000 بدأ من أقل سعر عند 7,868.28 ثم 7,974.54 ثم 7,995.82 ، والأن هو يحاول تأكيد إرتفاعه إذا أغلق أكثر من 8,759.74 .

أمـا وكالة يقولون لا أستمع لها ، وإنت أبخص مني فيها :laugh1:

تاسي : أقـول الله المستعان ، صحيح لـطاح الجمل كثرة سكاكينة.

المدردش : ما تشوف شـر طال عمرك :icon10:
===================================

تقبلوا تحياتي ،،،