الموضوع: "لن تجد لها مثيل مطلقا" ..... (1)

السلام عليكم ورحمة الله وبركاته

لعلنى ساسرد لكم اولى الموضوعات الخاصة بى والتى سارغب كثيرا بان تتميز بسهولة ووضوح المعانى بها

وارجو ان تكون مفيدة كثيرا لنا جميعا

(( البداية ))

كتير مننا دلوقتي بيسمع في الاخبار عن البورصة وتقلبات السوق والمؤشر طلع والمؤشر نزل فأول حاجة بتيجي في دماغك أن الكلام ده بتاع رجال الاعمال لكن بالعكس الان الكلام ده مهم بالنسبة ليك زي ما هو مهم ليهم لان ده أقتصاد بلدك وبيأثر عليك بطريقة غير مباشرة عشان كده انت لازم تشارك فية وانت ممكن تبدء طريق استثمارك بمبالغ صغيرة واحنا هنقولك بداية الطريق ازاي

اول حاجة هنتكلم يعني اية محفظة مالية : هي بكل بساطة حساب بيتفتح ليك داخل البورصة وبتحط فية فلوسك عشان كده بنسمية محفظة مالية
والسؤال دلوقتي فين افتح المحفظة دي واية اجراءات فتحها ؟؟
في حاجة لازم نعرفها كويس عن البورصة انك مينفعش تتعامل تعامل مباشر مع مؤسسة البورصة المصرية لازم يكون التعامل من خلال وسيط والوسيط ده بنسمية (( شركات السمسرة أو الوساطة )) الشركات دي بتقوم بدور الوسيط بينك وبين البورصة المصرية وطبعا بيكون بمقابل عمولة متقلقش مبتبقاش كبيرة بتتراوح ما بين (( واحد جنية ع كل الف جنية وبحد اقصا خمسة جنية ع كل الف جنية )) والعمولة بتكون ع اي عملية سواء كانت بيع او شراء

دلوقتي نيجي للاجراءات اللي لازم اعملها لفتح المحفظة بتعتي
اول خطوة هي اني اروح لشركة السمسرة واقولهم انا عاوز (( أتكود ))
اتكود دي يعني يكون ليا حساب في البورصة طب لية بنقول كلمة (( كود )) عشان في البورصة مبيتمش التعامل معاك باسمك لا بيكون ليك اسم وهو عبارة عن كود مكون من عده ارقام وحروف

وفي ملحوظة مهمة ان الكود ده بيبقا كود موحد ليك انت وخاص بيك انت داخل البورصة بتتعامل بالكود ده من خلال اي شركة سمسرة يعني ممكن تفتح حسابات في شركة واتنين وتلاتة بس كل الحسابات دي بتتعامل من خلال كود واحد وهو الكود الخاص بيك في البورصة المصرية

تاني حاجة هنتكلم عنها هي ازاي اتداول في الحساب بتاعي
دلوقتي عرفنا ازاي افتح المحفظة والسؤال الرئيسي دلوقتي اشتري وبيع ازاي ؟؟؟
انت طبعا بعد ما بتتكود بتحط الفلوس في الحساب من خلال شركة السمسرة او من خلال البنك
وفي ثلاث طرق تنفذ بيهم عمليات البيع والشراء :
الطريقة الاولي : هي انك تروح مقر الشركة وتقدم امر شراء / بيع مكتوب باليد وعلية توقيعك
ودي طبعا طريقة قديمة وتعتبر بطيئة جدا في الوقت الحالي مع التغير اللحظي لاسعار الاسهم
الطريقة الثانية : هي عن طريق مكالمة تلفونية مسجلة مع المنفذ الخاص بيك الموجود في مقر شركة السمسرة . ودي برضة طريقة تعتبر بطيئة الي حد ما ووارد فيها الخطاء البشري
الطريقة الثالثة : هي الطريقة الاحدث والاسرع والادق وهي طريقة التداول الالكتروني اللي ظهرت مع التطور التكنولوجي ودي بقدر من خللها ابعت امر البيع او الشراء بتاعي من خلال الانتر نت عبر حساب مفتوح ليا ع موقع شركة السمسرة الالكتروني

ثالث نقطة هنتكلم عنها هي ازاي ادير المحفظة بتعتي ادارة امنة ؟
طبعا قرار الشراء لاول مره بيبقا صعب جدا ع اي مستثمر مبتدأ
وعشان تاخد القرار ده صح لازم تحدد انت عاوز تعمل اية بظبط تبقا مستثمر طويل الاجل ولا مستثمر طويل الاجل ولا مضارب بيدور ع اي فرصة ممكن يجي منها مكسب

وبعد ما تحدد نوع استثمارك لازم تدرس وتابع اخبار السوق ككل في الفترة اللي انت هتبدا فيها وتحدد القطاعات اللي ممكن تناسب فكرك الاستثماري
وطبعا كل ده بيبقا بالمتابعة مع المحلليين الفني والمالي اللي بتوفرهملك شركة السمرسرة
المحلل المالي : هو اللي هيساعدك في تحديد الشركات المناسبة لاستثمارك لانة هو اللي بيدرس القوائم المالية للشركة ويقدر يقولك اذا كانت الشركة بتحقق مكاسب او خساير

المحلل الفني : هو اللي بيعطيك النصيحة عن التوقيت المثالي للشراء في اسهم الشركة اللي انت اخترتها وده بيكون من خلال تحليلة لحركة السهم في السوق
وفي شوية نصايح مهمة لازم تعرفها :
1- متشتريش بفلوسك كلها خلي ديما معاك نسبة معينة سيولة
2- حاول تنوع من استثماراتك يعني متشتريش بفلوسك كلها في شركة وحدة
3- لازم توازن في محفظتك بين اسهم النمو والدخل والاسهم الدفاعية
4- لازم تتابع الاخبار باستمرار ومتتسرعش في الحكم ع خبر
5- خلي دايما هدفك واضح ادامك ومتتاثرش بالخساير واعرف انك لازم تخسر عشان تتعلم من خسرتك وتقدر تكون ليك شخصية استثمارية

انتظروا البقية
بالتوفيق لنا جميعا .......

معلومات مهمة جدا
واحلى مافيها انها سلسة ومبسطة ومكتوبة كأتها دردشة